Category: Projèctes

Eth deluns 20 de març se hec era I Jornada d’Innovacion e Economia dera Val d’Aran, un eveniment organizat per HèPic, eth Conselh Generau d’Aran, eth Ministèri entara Transicion Ecologica e eth Rèpte Demografic e era Associacion d’Innovacion en Territòris de Montanha.

Aguest acte constèc de dues parts: ena prumèra se podec enténer a Carlos Barrabés, fondador de Barrabés e ESNEPI, era Escòla de Negòcis deth Pirenèu, que dèc modèls entà preveir e poder innovar en territòri. Dempús intervenguec Francés Boya, secretari generau entath Rèpte Demografic, qu’expliquèc com es Centres d’Innovacion Territoriau son un modèl d’instrument entà lutar contra eth despoblament.

Ena dusau part dera jornada, es presents, provenenti dera Val d’Aran e de d’auti territòris coma Òsca, Lhèida e tanben Madrid, participèren enes dinamiques de networking. Damb aguest trabalh en equipa, s’identifiquèren es desfisi particulars qu’a cada sector entà innovar e configurèren ua lista de solucions e responses. Aguesta session, ath delà d’èster un moment de trabalh en equipa, servic tà generar relacions professionaus entre es participants. Facilitèc eth creishement deth hilat d’agents que configure er ecosistèma HèPic.

Dempús d’aguesta jornada, que compdèc damb era participacion de 80 persones, se sajarà de dar solucion as diferenti objectius identificadi e arténher d’aguesta manèra d’aumentar eth teishut emprenedor e empresariau des territòris ruraus e de montanha.

Eth passat deluns dia 17 d’octobre s’inaugurèc era cobertura satellitau, un projècte innovador que dotarà de connexion de banda ampla e melhorarà era prestacion de servicis ena montanha.

En aguest acte, que se hec en refugi dera Artiga de Lin, a on sigueren presents representants de Mobile World Capital Barcelona, Hispasat, Arantec, IDAPA, i2cat, Secretària de Polítiques Digitals dera Generalitat de Catalonha, HèPic e eth Conselh Generau d’Aran, se metec a pròva era connexion a trauès d’ua simulacion de trucada d’emergéncia, connexion wi-fi e bambolha IoT. Se podec verificar in situ coma aguest nau instrument tecnologic permet establir ua comunicacion per video e audio damb era sala de contròl e emergéncies de Pompièrs-Emergéncies e com era connexion via satellit daurís es pòrtes a ua infinitat de possibilitats de digitalizacion.

Anterioraments, aguest endret tan visitat non compdaue damb cap de tipe de cobertura telefonica. Aguest projècte innovador artenh a redusir es manques de connexion en endrets ruraus de montanha. Per açò, e coma conseqüéncia, ei un projècte comprometut damb es caracteristiques deth territòri e que preten melhorar era qualitat de vida des sòns abitants e visitants. Damb aguest tipe de projèctes se vò aufrir uns servicis de qualitat entara poblacion e, atau madeish, retier e atrèir eth talent des persones des pòbles.

Aguest trabalh s’a pogut amiar a tèrme gràcies ara interaccion de diferenti actors locaus, coma HèPic, Arantec o eth Conselh Generau d’Aran damb actors extèrns coma Hispasat, Mobile World Capital Barcelona, IDAPA, i2cat e a on HèPic a actuat coma coordinador e dinamizador. Atau, eth projècte s’a materializat en un HotSpot Wifi laguens deth refugi entà facilitar era gestion d’aguest, un HotSpot Wifi en airau d’influéncia deth refugi entà atau méter a disposicion un punt segur d’emergéncies e connexion, un interfòn e camèra web damb connexion dirècta damb eth nombre d’emergéncies 112 e, tanben, un punt d’accès de hilat inalambric LoRa entà foncionalitats coma era ramaderia. Es projèctes innovadors com eth hilat de connectivitat satellitau permeten melhorar era qualitat de vida des persones de territòris ruraus de montanha. Aguest projècte a estat acompanhat e coordinat per HèPic entà ajudar ara innovacion a establir-se en territòris ruraus e de montanha. Se tu tanben ès ua persona innovadora, non dobtes en meter-te en contacte damb nosati a trauès deth mail: infohepic@aran.org o entath numèro de telefòn: 667 670 271.

Pendent eth darrèr mes de mai se hec ua jornada de workshop damb agents publics e privats entà conéisher e concretar quines foncionalitats poderie auer eth 5G en Aran. Mès concrètaments, se trabalhèc entà descríuer es potencialitats d’aguesta tecnologia disruptiva e com aplicar-la a sectors com eth torisme, era cultura e eth patrimòni. En tot crear naui contenguts, mès ath madeish temps generant know-how tecnologic.

Des d’alavetz, es equipes de trabalh public-privat an auançat en dessenh de possibles projèctes pilòt a on era connexion 5G se place en centre. Per aquerò, eth darrèr deluns 17 d’octobre, anèren tara Val d’Aran responsables dera Secretaria de Politiques Digitaus dera Generalitat de Catalonha, i2cat, IDAPA, Mobile World Capital, HèPic e eth Conselh Generau d’Aran entà verificar eth servici que pòden aufrir es antenes qu’emeten 5G plaçades en Aran.

Aguestes installacions se tròben en municipi de Naut Aran, concrètaments en entorn de Vaquèira e en Plan de Beret. En aguesta visita se podec verificar, sense cap d’inconvenient, eth senhau qu’emeten e se sagèc de concretar, gràcies ad aguesta informacion, eth dessenh de projèctes damb 5G.

Aguest tipe de projèctes innovadors permeten as territòris ruraus de montanha, contunhar damb eth desvolopament professionau des persones des sòns municipis. Ara, aguesti lòcs se somen as territòris interconnectadi çò que permet atrèir e restacar eth talent des persones entà que poguen desvolopar es sues activitats professionaus sense auer de deishar eth sòn lòc de residéncia.

Aguest projècte a estat acompanhat per HèPic entà ajudar ara innovacion a assetiar-se en territòris ruraus e de montanha. Se tu tanben ès ua persona innovadora, non dobtes en contactar-mos a trauès deth mail: infohepic@aran.org o peth numèro de telefòn: 667 670 271.

Eth dimèrcles 14 de seteme se hec en Vielha era presentacion dera XIII Edicion des Prèmis Antartics de supòrt ara sciéncia, era tecnologia, eth mèdi ambient e era comunicacion. Aguesti prèmis son organizadi pera Universitat Abat Oliba (CEU) e er Observatòri pera seguretat, defensa e cooperacion de Barcelona en collaboracion damb eth Conselh Generau d’Aran.

Er objectiu d’aguesta convocatòria ei poder escuélher dus projèctes de caractèr investigador enes sectors dera educacion, sciéncia, tecnologia e mèdiambientau e un projècte de comunicacion tà que, dempús, siguen metudi en marcha ena Antartida.

Es Prèmis Antartics son un projècte innovador que preten redusir era brèca investigadora entre era sciéncia e era societat e, ath madeish temps, sage de protegir era Antartida. Era sua vision ei clara: s’a d’evitar era hujuda de talent e deth professorat universitari que hè recèrca e desvelhar es desirs des joeni e joenes universitaris e universitàries damb perfiu investigador, d’accedir ara aventura scientifica a trauès des Prèmis Antartics.

Era collaboracion de HèPic e deth Conselh Generau d’Aran damb aguest projècte permeterà, en prumèr lòc, acuélher pendent uns dies as candidats e candidates seleccionades ena Val d’Aran entà que hèsquen un cors de capacitacion tecnica a cargue des Pompièrs Emergéncies e eth Grop de Rescat Especiau d’Intervencion en Montanha.

Damb aguest tipe de collaboracions s’arreconeishen es iniciatives innovadores e es capacitats investigadores e professionaus deth capitau uman d’airaus ruraus de montanha e, sustot, dera Val d’Aran. E, ath madeish viatge, ei un reconeishement des compromisi e eth trabalh aquerit pes administracions locaus ena preservacion deth mèdi ambient.

Tà poder participar enes Prèmis Antartics, cau èster estudiant de fin de grad d’estudis universitaris d’investigacion scientifica prepausada pes universitats collaboradores, joeni scientifics de mens de 40 ans prepausadi pes organismes collaboradors, periodistes o productors, professorat de grad o postgrad o militar. Cau presentar eth trabalh abans deth 15 d’octobre ena adreça de corrèu: info@observatoriobarcelona.es.

Entà mès informacion e tà conéisher damb mès detalh es condicions, podetz visitar eth següent ligam: https://premiosantarticos.com/ediciones o contactar damb HèPic a trauès deth corrèu electronic: infohepic@aran.org o en telefòn 667 670 271.

Eth passat diuendres 15 de junhsèga, eth secretari generau peth Rèpte Demografic, Francés Boya, era Sindica d’Aran, Maria Vergés, eth president dera Deputacion de Lhèida, Joan Talarn, e eth president dera Deputacion de Uèsca Miguel Gracia, formalizèren era signatura deth convèni tath desvolopament deth Projècte d’Innovacion Territoriau e eth Desvolopament de Cellules d’Innovacion Rurau.

En aguest acte i participèc Guilhèm Piris Casasnovas, coordinador d’HèPic, entà explicar eth foncionament pròpi e tanben dar a conéisher a toti es assistents eth desvolopament qu’a auut HèPic.

Mejançant aguest convèni se preten replicar eth CIT d’Innovacion installat en Aran gràcies ara ampliacion, consolidacion e creacion de tres Cellules d’Innovacion Rurau: era Cellula d’Innovacion Rurau Pirenèu-Aran (que comprenerà territòris pirenencs de Uèsca e Lhèida, atau com era Val d’Aran), era Cellula d’Innovacion Rurau Tèrres de Lhèida e era dera província de Uèsca, en tot replicar eth modèl iniciat damb eth Hub d’innovacion HèPic en Aran. Eth marc de cooperacion propiciat peth convèni afavorirà es sinergies entre es tres cellules desvolopades.

Aguest acte reïtère eth compromís de diferentes administracions pes persones emprenedores locaus e era innovacion en mon rurau. D’aguesta manèra, eth modèl de HèPic s’estenerà per diuèrsi lòcs entà poder contunhar trabalhant en hilat. Se vòs saber-ne mès, vòs portar a tèrme o finançar un projècte, non dobtes en contactar damb nosati a trauès deth mail infohepic@aran.org o consultant eth nòste Twitter @HePic_HUB.

Era mobilitat sostenibla se desvolòpe en territòri de montanha. Eth deluns 13 de junh se heren en Bagergue es pròves d’un Plan Pilòt tà un Microbús 100% electric.

Aguest projècte ei possible gràcies ara collaboracion dera EMD de Bagergue, eth Conselh Generau d’Aran, eth Ministèri pera Transicion Ecologica e eth Rèpte Demografic e es empreses Electric Riders, Arantec e Baqueira Beret. Aguesta pròva tà fomentar eth transpòrt collectiu e sostenible preten poder transportar esquiadors de Bagergue enquia Baqueira e aufrir un servici de ligam tàs estudiants damb eth transpòrt escolar der Institut de Vielha. 

Es veïculs electrics compartits vòlen redusir, d’un costat, eth nombre de veïculs privats e, der aute, er impacte dera emprenta ambientau en territòri. Aguest autobús, qu’ara estúdie aspèctes tecnics dera rota com era capacitat de manòbra e era autonomia deth dispositiu, s’a de compréner coma un instrument laguens d’ua tendéncia de foment dera transicion energetica. Per açò madeish, era energia entà produsir era electricitat der autobús se base en hònts d’energia renovabla coma era idroelectrica. 

Dempús dera pròva s’analisaràn es resultats e s’establirà era manèra de méter en foncionament aguest transpòrt sostenible dera manèra mès eficienta possibla. Aguest projècte ei ua mòstra d’iniciativa innovadora que diferenti agents publics e privadi trabalhen comprometudi damb es territòris ruraus de montanha. Per açò, se ne vòs saber mès, vòs amiar a tèrme o finançar un projècte, non dobtes en contactar damb nosati a trauès deth mail: infohepic@aran.orgo consultant eth nòste compde de Twitter: @HePic_HUB.

Es dies 17 e 18 de mai s’a hèt era presentacion deth projècte europèu PYRMOVE en Pirenèu aranés. Aguest estudi, cofinançat peth Hons Europèu de Desvolopament Regionau (FEDER) en marc deth Programa Interreg V-A Espanha-França-Andòrra, se centre ena prevencion e gestion deth risc restacat a eslissament de tèrra a trauès d’un partenariat format pera Universitat Politècnica de Catalunya, eth Bureau de Recherches Geologiques et Minières, Institut Cartogràfic i Geològic de Catalunya, Andorra Recerca + Innovació e eth Centre d’études et d’expertise sur les risques, l’environnement, la mobilité et l’aménagement.

Eth territòri deth Pirenèu ei afectat per eslissaments de tèrra que provòquen desperfèctes enes carretères, en restanques e en desvolopament d’activitats e servicis. Ei per aguest motiu que s’a volut amiar a tèrme ena localitat de Vielha un seminari de presentacion des resultats, hèr un talhèr damb instruments de prevencion e analisis e visitar en persona quauqu’uns des eslissaments de tèrra estudiats.

Damb era preséncia dera comunitat scientifica catalana, andorrana e francesa, es territòris ruraus de montanha se placen non sonque coma subjècte d’estudis internacionaus, senon que tanben coma espacis a on exposar es resultats. Açò ei ua apòsta per estudi e era divulgacion scientifica enes pòbles. 

Atau madeish, aguest eveniment a permetut ara comunitat scientifica, as universitats, as servicis geologics e a d’autes institucions governamentaus implicades identificar es avantatges qu’a un territòri rurau que fomente era innovacion. Des dera proximitat damb es subjèctes d’estudi enquiara capacitat d’auer un intercambi d’idees gràcies ar ecosistèma que se forme en aguesti espacis.  Aguest ei eth començament d’ua tendéncia. Era comunitat de recèrca promocione es territòris ruraus e de montanha coma espacis entà desvolopar es sòns projèctes. Per açò, se vòs desplegar es tòns projèctes en territòris ruraus de montanha, non dobtes en contactar damb nosati a trauès deth mail: infohepic@aran.org.

Dempús dera presentacion der Airau 5G Aran a era que participèren empreses, personau tecnic e representants politics, eth dia 25 de mai s’amièc a tèrme era prumèra jornada de workshop de “Era tecnologia 5G e eth sector dera cultura e er auviatge”. Aguest tipe d’activitats permet, d’un costat explicar e divulgar es ahèrs tecnics d’aguest nau estrument e, de un aute costat, facilitar as empreses e administracions ua plataforma de trabalh a on collabòren entà exprimir es sues preferéncies ara ora d’utilizar aguesta tecnologia.  

Lèu 40 participants s’amassèren entà escotar as representants deth Conselh Generau d’Aran, dera Província de Lhèida, deth Naut  Pirenèu e Aran, dera Cramba de Comèrç de Lhèida, dera Generalitat de Catalonha, deth Mobile World Capitau e der i2CAT. Toti e totes sigueren d’acòrd damb era importància dera innovacion, era tecnologia e era digitalizacion coma motors de desvolopament d’un territòri. Damb ua part en format digitau e dubèrt e, d’aute costat, ua segona damb invitacion, tanben siguec un espaci de reflexion des participants.  

Es airaus 5G permeteràn assegurar era qualitat des servicis as persones, desvolopar projèctes sostenibles, en definitiva, ei un estrument facilitador entà atrèir talent destacat damb es comunicacions e era tecnologia.  

En conseqüéncia, s’identifiquèren projèctes potenciaus damb base 5G que poguen amiar-se a tèrme a miei plaç en territòri d’Aran e de l’Alt Pirenèu. Per exemple, se destaquèc eth papèr dera 5G ena mantenença e difusion der auviatge materiau e immateriau mejançant era realitat aumentada. Atau madeish, se pòden desplegar projèctes que dotarien de seguretat a lòcs a on actuauments non i a cap tipe de connectivitat gràcies ara monitorizacion Per açò siguec substanciau eth papèr des participants e es sues inquietuds.   Espacis coma aguest favorissen er escambi d’invents, era participacion e era collaboracion entre es diferenti agents. Se vòs visualizar eth contengut deth workshop, accedís ath següent ligam. Tanben, entà saber-ne mès, non dobtes en contactar damb nosati a trauès deth mail infohepic@aran.org o en tot consultar eth nòste Twitter @HePic_HUB. 

Eth projècte Airau 5G Aran seguís a bon ritme. Eth dia 20 de mai se presentèc er Airau 5G Aran. Aguest projècte transversau permeterà establir pilòts de cobertura 5G en territòri e atau dinamizar projèctes tecnologics innovadors a trauès de workshops especifics.  

Ena presentacion assistic era sindica d’Aran, eth vicepresident e conselhèr de Politiques Digitaus e Territòri dera Generalitat de Catalonha, eth president dera Cramba de Comèrç de Lhèida, eth director deth Patronat de Promocion Economica dera Deputacion de Lhèida, eth director de Telefonica Mediterrani, eth director de Connectivitat e Desvolopament de Negòci entath sector public dera Fondacion 12CAT, eth director der Institut entath Desvolopament e era Promocion deth Naut Pirenèu e Aran e empreses. Es participants e participantes poderen intervier e explicar es implicacions d’aguesta tecnologia en hilat economic e sociau.  

Eth desplegament d’airaus 5G ei ua iniciativa impulsada pera Generalitat de Catalonha, era Fondacion i2CAT e eth Mobile World Capitau Barcelona. HèPic e eth Conselh Generau d’Aran mos auem encuedat d’articular aguest projècte ena Val d’Aran aportant eth coneishement der entorn e era comunitat de collaboradors deth CIT. Çò que se preten ei crear espacis a on s’agreguen es diferentes iniciatives adreçades a promòir era tecnologia 5G coma un instrument facilitador. Er internet des causes possibilitarà era diversificacion dera economia e, ath delà, harà mès accessibles es servicis as persones.  

Dempús dera presentacion ei previst amiar a tèrme activitats destinades a generar coneishements e projèctes ath torn dera tecnologia 5G. Aguest estrument ei ua mòstra de compromís damb era innovacion en zònes ruraus de montanha. Per açò, se vòs saber-ne mès, non dobtes en contactar damb nosati a trauès deth mail infohepic@aran.orgb o consultant eth nòste Twitter @HePic_HUB. 

Eth dimèrcles 4 de mai se hec ena Deputacion de Huesca ua presentacion deth Centre d’Innovacion Territoriau de Huesca. Era equipa de HèPic siguec convidada ad aguesta jornada entà explicar eth sòn modèl e eth sòn foncionament.

Era Deputacion de Huesca ven de presentar era creacion deth Centre de Innovacion Territoriau, un instrument potenciat peth Ministerio para la Transición Ecológica e Reto Demográfico. Ei concebut coma exemple d’organizacion enes zònes ruraus entà desvolopar projèctes innovadors que s’intègren enes naues dinamiques economiques. Eth ministèri vò crear un hilat de centres entà, d’aguesta manèra, fomentar era activitat economica e crear iniciatives innovadores entà hèr front as rèptes des territòris.

En tot arregraïr era invitacion deth president dera Deputacion de Huesca e deth secretari generau peth Rèpte Demografic, eth nòste companh Jorge Lafuente Orte siguec er encargat de presentar HèPic. Ath long dera sua explicacion remerquèc eth foncionament en hilat d’aguest Centre d’Innovacion Territoriau, que permet trabalhar amassa ath sector public e ath sector privat entà bastir projèctes comuns e, ath delà, generar coneishement que se compartís damb d’auti agents e era societat en generau. Aguest hèt permet conéisher es besonhs des sectors public e privat e, dempús, poder aufrir responses personalizades a cadun des sòns besonhs. 

Dempús dera jornada en Senat francés e era presentacion deth centre de Castelló, HèPic se place coma modèl d’organizacion e de trabalh entà naui CIT. Tanben se demòstre era volontat d’acompanhar a d’auti CIT e crear un hilat entà collaborar en projèctes sectoriaus. 

Aguesta conferéncia permetec hèr a conéisher HèPic coma exemple de projècte entà desvolopar es territòris ruraus e aufrir solucions as problèmes actuaus mejançant era innovacion. Per açò, non dobtes en contactar damb nosati entà descorbir eth nòste foncionament o s’ès ua persona innovadora que vò auançar damb era sua idea. Enviatz-mos un corrèu tara adreça infohepic@aran.org.