HèPic ei eth Hub d’innovacion entarra Val d’Aran e es territòris ruraus de montanha. Se configure coma un ecosistèma d’innovacion especializat en mèdi rurau e entàs territòris de montanha. Ei impulsat peth Conselh Generau d’Aran e nèish a conseqüència deth procès d’innovacion e participacion sociau Aran Accion 2020-2030. HèPic nèish damb vocacion d’èster referent e trebalhar en hilat damb d’autes iniciatives similares en mèdi rurau, e d’aguesta manèra, èster ua airina transformadora dera Val d’Aran, des territòris de montanha e deth mèdi rurau.
Eth propòsit d’aguest Hub ei era diversificacion deth modèl economic des territòris de montanha a trauès dera innovacion, creant oportunitats e retorn economic, a compdar des rèptes actuaus. Coma per exemple, sense excludir d’auti sectors, abordaram projèctes basadi ena innovacion toristica, es espòrts, es servicis as persones, era agricultura e era ramaderia de montanha, era tecnologia e era energia.
Coma s’organize HèPic?
HèPic, coma ecosistèma d’innovacion, intègre toti es agents deth territòri. Ei per aqueth motiu que, d’un costat, compde damb eth trebalh dera Administracion Publica, qu’ei qui guide e coordine es projèctes de domeni public. Der aute, entà poder aufrir servicis concrets e que responen as besonhs d’empreses e de persones emprenedores, compde damb eth trebalh dera Associacion d’Innovacion en Territòris de Montanha.
Coma se trebalharà en HèPic?
A trauès de 4 pilars:AGREGACION
GENERACION
FACILITACION
COMUNICACION
Èm de montanha, èm ruraus, mès non èm ua mòda o ua destinacion toristica, èm molt mès. E per açò madeish, eth principau objectiu d’HèPic ei lutar contra era deslocalizacion, ei a díder, arténher èster competitius des des nòstes bères e remòtes montanhes, e era desestacionalizacion, en tot mantier eth nòste desvolopament economic pendent tot er an.
Entà arténher aguesti rèptes, des d’HèPic volem afavorir era construccion de naues empreses que apòsten pera innovacion. E innovar implique trapar solucions naues e eficientes entà transformar quinsevolh sector o mercat. Tostemp damb critèris de sostenibilitat entà preservar er entorn que mos distinguís. Per tant, inculcant era cultura dera innovacion cercam generar ua major e melhor ocupacion en territòris de montanha e endrets ruraus.
Èm es prumèrs, mès non volem èster es unics. Mos encante compartir, e era nòsta major aspiracion ei convertir-mos en un centre de referéncia dera innovacion en territòris de montanha. Elaborant metodologies, productes e servicis damb basa tecnologica, mediambientau, sociau e culturau reprodusibles en territòris de caracteristiques similares
Èm molt conscienti dera valor qu’a eth nòste capitau naturau, uman e culturau. Trebalham entà conservar-lo e tà qu’es nòstes tèrres siguen un lòc fertil entà arténher es sònis, aspiracions e projèctes de quinsevolh qu’apòste per innovar.
- Sostenibilitat
- Innovacion
- Responsabilitat
- Sociau e Mediambientau
- Resiliéncia
- Connectivitat
